CECELEPO

Dapa Vonis Sa Taong

ANA satu nih, dia paleng untung. Biar dapa tangkap gara-gara bawa sabu-sabu, tapi cuma dapa vonis sa taong sa dari majelis hakim, waktu sidang di PN Ambon, 20 Agustus 2020. Dia nama Jack Toll Bert Siregar (39), tinggal di Suli, Kecamatan Salahutu, Maluku Tengah.

Tapi Jack balom bisa sanang dolo, barang Jaksa Penuntut Umum (JPU) yang tuntut dia tujuh taong seng tarima bae deng putusan hakim. Jaksa lalu banding.

JPU bilang, kalakuang ana Jack nih su sesuai deng pasal yang dituntut, yakni pasal 111 ayat (1) Undang-undang RI Nomor 35 tahun 2009 tentang narkotika.

“Jaksa dong banding barang majelis hakim kasih putus seng sama deng pasal yang dituntut JPU. Majelis hakim kasih putus katong pung klien terbukti bersalah deng pasal 127 ayat (1) Undang-undang RI Nomor 35 tahun 2009 tentang narkotika,” kata PH Alfred Tutupary for Rakyat Maluku, Minggu, 30 Agustus 2020. Selain Tutupary, pengacara Dino Hulisen iko damping Jack.

Par basudara dong tau, Jack ini dia dapa tangkap par hari Sabtu tanggal 25 Januari 2020 di pusat pembelanjaan ACC, Kecamatan Baguala kota Ambon. Kamuka, ada anggota polisi yang dapa dengar bilang, Jack ada simpang norkoba jenis sabu.

Abis dong dengar info langsung dong pantau. Saat Jack ada bajalan di ACC, seng tungga lama, dong langsung tangkap jua. Waktu diperiksa, Jack kasih tau kalau dia dapa sabu satu buah plastik kecil dari dia pung tamang, Hendra Tahya yang sampe oras masih DPO.

Jack deng Hendra bakudapa di Belakang Soya lalu Hendra kasih dua bungkus sabu, Jack kasih uang dua juta. Jack mengaku sikat satu paket di dia pung cewe rumah, lalu satu paket lai dia pake akang, stengahnya dia rencana mau jual for Anton di ACC yang juga masih DPO. Polisi langsung bawa ana Suli ini deng barang bukti sabu 0,17 gram ke Polres for proses dia. (*)

======================
--------------------

Berita Populer

To Top