CECELEPO

Musti Tempel Harga Oto

HARGA oto su nae dar dua minggu lalu, tapi masi ada saparu orang yang tar percana. Dong pung mau setiap oto harus tempel harga oto di dong pung pintu oto.

“Kalau harga oto nae, itu harus tempel akan pung harga di muka pintu oto, supaya jang katong kaget bagini,” kata usi Ida, Kamis 16 September 2021.

Dia bilang, memang su dengar kalau harga oto nae, tapi untuk pastikan musti dong tempel harga, supaya jang ada bakumalawang harga oto.

“Ini katong su bakumalawang, kalau ada harga katong lia akan langsung bayar to,” kata Ida bakanor.

Dia jua bilang, sopir oto jua musti kasiap uang receh, barang kabanyakan, sopir deng kanek dong langsung kasbulat akan pung harga.

“Kaya katong dari IAIN ka pasar, harga oto ampa ribu tujuh ratus. Ini sopir oto langsung patok akang jadi lima ribu,” story dia.

Nanaku koran ini, par banya sopir oto su pasang harga di muka pintu, tapi ada sebagian sopir yang balom pasang lae. (*)

--------------------

Berita Populer

To Top