CECELEPO

Polisi Loko Polisi

SU jadi polisi tuh harus unju jalan bae par orang. Mar, Djoni Warter de Fretes nih seng kawan e. Pa Pol warga di Jl. Mutiara no.87 RT.002/RW 003, Kelurahan Rijali, Kecamatan Sirimau ini dia sadoks lae. Laki-laki bale pi terlibat par salahgunakan narkoba jenis sabu-sabu.

Seng tunggu lama, Djoni dapa loko jua dari dia pung tamang-tamang polisi sandiri par 6 Maret 2020.

Yang kastau kalo polisi nih terlibat akang barang haram itu Jhony Thoipilus Luamase yang su dapa loko kamuka. Thoipilus sebut polisi Djoni, barang dapa interogasi. Dia mangaku beli narkoba dari Djoni.

Waktu itu su tenga malam. Dia dapa loko di tampa parkir Hotel Amans, Jl W.R Supratman No.1 Kelurahan Uritetu. Polisi yang loko dia dapa barang bukti uang Rp1.050.000, deng satu buah pipet, korek api gas, satu buah gulungan sabu dengan ukuran plastik kecil dililit selotif warna hitam, HP Oppo dan Vivo.

Dong langsung bawa Djoni deng barang bukti samua ke Polres par proses. Rabu, 2 September 2020 kamareng, polisi Djoni su dapa vonis dar hakim sa taong penjara. Laki-laki terbukti
salah bikin tindak pidana penyalahgunaan guna narkoba sesuai pasal 127 Ayat (1) Huruf A UU No 35 Tahun 2009 tentang narkotika.

Bapa hakim Ahmad Hukayat deng Ismael Wael, juga Rahmad Sela bilang, yang kasbarat polisi Djoni pung hukuman barang dia anggota Polri yang harus jadi garda paling depan par berantas narkoba di kalangan masyarakat.

Sedang yang kas ringan, dia sopan dan akui kesalahan. Seng tau ini permainan apa sampe polisi Djoni cuma dapa vonis sa taong. Jaksa penuntut S Aryani jua tuntut dia ringan, sa taong anam bulan sa.

Dapa vonis ringan bagitu, terdakwa yang dapa damping dari penasehat hukum Robert Lesnussa langsung bilang tarima akang putusan itu jua mo.(*)

======================
--------------------

Berita Populer

To Top